सभामुख डोलप्रसाद अर्यालले प्रधानमन्त्री वालेन्द्र साह (बालेन) लाई संसदमा अनिवार्य उपस्थित भई सांसदहरूको जिज्ञासाको उत्तर दिन निर्देशन दिनुपर्ने माग तीव्र बनेको छ। संसद नियमावलीअनुसार प्रधानमन्त्रीले प्रत्येक महिनाको पहिलो सातामा कम्तीमा एक दिन संसदमा उपस्थित भएर सांसदहरूले उठाएका प्रश्नहरूको जवाफ दिनुपर्ने व्यवस्था छ।

तर प्रधानमन्त्री बालेन हालसम्म संसदमा उपस्थित भएर कुनै सम्बोधन नगरेपछि प्रतिपक्षी दलका सांसदहरूले उनको उपस्थितिको माग गर्दै लगातार दबाब दिइरहेका छन्।

यसैबीच, सभामुखले पनि नियम कार्यान्वयन गराउँदै प्रधानमन्त्रीलाई संसदमा बोलाएर जवाफ दिन स्पष्ट रुलिङ नगरेको भन्दै आलोचना भइरहेको छ। यही विषयलाई लिएर संसद बैठक पटक–पटक अवरुद्ध हुँदै आएको छ।

बिहीबार दिउँसो बसेको बैठक पनि प्रधानमन्त्री अनुपस्थित भएपछि अघि बढ्न सकेन। कार्यसूचीमा प्रवेश गर्नासाथ विपक्षी सांसदहरूले उभिएर विरोध जनाए। उनीहरूले प्रधानमन्त्रीलाई संसदप्रति जिम्मेवार बन्न आग्रह गर्दै सभामुखलाई पनि निरीह भूमिका नदेखाउन चेतावनी दिएका छन्।

प्रधानमन्त्रीको अनुपस्थिति र त्यसबारे स्पष्ट पहल नहुँदा संसद बैठक पुनः अवरुद्ध भएको हो।