काठमाडौँ । भारत भ्रमणमा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने ले आज भारतीय जनता पार्टी (भाजपा)का शीर्ष नेताहरूसँग महत्वपूर्ण राजनीतिक भेटवार्ता गर्ने कार्यक्रम रहेको छ।

रास्वपाका प्रवक्ता मनिष झा का अनुसार नयाँ दिल्लीस्थित भाजपा मुख्यालयमा हुने छलफलमा भाजपा अध्यक्ष नितिन नबिन सहितका नेताहरू सहभागी हुनेछन्। भेटवार्तामा नेपाल–भारतबीचका लोकतान्त्रिक शक्तिहरूको अनुभव आदानप्रदान, राजनीतिक सम्बन्ध विस्तार तथा आपसी सहकार्यका विविध विषयमा केन्द्रित भएर छलफल हुने बताइएको छ।

सभापति लामिछाने भाजपा अध्यक्ष नबिनको निमन्त्रणामा पाँचदिने भारत भ्रमणका लागि सोमबार नयाँ दिल्ली पुगेका हुन्। भ्रमण अवधिमा उनले भारतमा रहेका नेपाली समुदाय, पार्टीका समर्थक तथा शुभेच्छुकहरूसँग अन्तरक्रिया गर्ने कार्यक्रम रहेको छ। साथै, उनले अयोध्या को धार्मिक तथा सांस्कृतिक भ्रमणसमेत गर्नेछन्।

लामिछाने नेतृत्वको प्रतिनिधिमण्डलमा उनकी पत्नी निकिता पौडेल, रास्वपाका सहमहामन्त्री तथा प्रतिनिधिसभा सदस्य विपिनकुमार आचार्य, सचिवालय सदस्य एवं सांसद दीपक बोहरा तथा स्वकीय सचिव प्रदीप आचार्य सहभागी छन्।

यस भ्रमणका क्रममा हुने उच्चस्तरीय भेटघाट तथा अन्य कार्यक्रमलाई व्यवस्थित बनाउन नयाँ दिल्लीस्थित नेपाली दूतावास ले आवश्यक समन्वय गरिरहेको जनाएको छ।