काठमाडौं — ट्राफिक नियम उल्लंघन गर्ने चालकलाई हालको भन्दा निकै कडा आर्थिक दण्डको व्यवस्था गर्नुपर्ने प्रस्ताव गरिएको छ। काठमाडौं उपत्यका ट्राफिक प्रहरी कार्यालयका प्रहरी वरिष्ठ उपरीक्षक (एसएसपी) सुरेशप्रसाद काफ्लेले नियम मिच्ने व्यक्तिलाई ५ हजारदेखि ५० हजार रुपैयाँसम्म जरिवाना गर्न सकिने कानुनी व्यवस्था आवश्यक रहेको बताएका छन्।

सङ्घीय संसद्को पूर्वाधार विकास समितिको बैठकमा ‘सार्वजनिक सवारी तथा ढुवानी व्यवस्थापन’ विषयमा प्रस्तुति दिँदै उनले हाल लागू रहेको ५ सयदेखि १ हजार ५ सय रुपैयाँसम्मको जरिवाना प्रभावकारी नभएको उल्लेख गरे।

उनका अनुसार न्यून जरिवानाका कारण चालकहरूमा नियम पालना गर्ने दबाब सिर्जना हुन सकेको छैन। “अहिलेको जरिवानाले कसैलाई पनि सचेत बनाएको देखिँदैन। ट्राफिक अनुशासन कायम गर्न जरिवाना रकम उल्लेख्य रूपमा बढाउन आवश्यक छ,” उनले भने।

एसएसपी काफ्लेले काठमाडौं उपत्यकाको ट्राफिक व्यवस्थापनमा तत्काल सुधार नगरे अवस्था झन् जटिल बन्ने चेतावनी पनि दिएका छन्। प्रविधिमैत्री ट्राफिक प्रणालीको अभावले समस्या बढ्दै गएको उल्लेख गर्दै उनले आगामी दुई वर्षभित्र सडक सञ्जाल अत्यधिक जामको चपेटामा पर्न सक्ने बताए।

“यदि वर्तमान अवस्थामै सीमित रहने र प्रविधिमा पर्याप्त लगानी नगर्ने हो भने केही वर्षमै उपत्यकाको यातायात व्यवस्था संकटग्रस्त बन्न सक्छ। एम्बुलेन्ससमेत समयमै अस्पताल पुग्न नसक्ने अवस्था सिर्जना हुन सक्छ,” उनले चेतावनी दिए।

उनले ट्राफिक व्यवस्थापनलाई आधुनिक प्रविधिसँग जोड्दै दीर्घकालीन समाधानतर्फ अघि बढ्न सरकार र सम्बन्धित निकायलाई आग्रह गरेका छन्।