सङ्खुवासभा । लगातारको वर्षासँगै आएको पहिरोले सङ्खुवासभाका विभिन्न क्षेत्रमा जनधन तथा कृषि क्षेत्रमा क्षति पुर्‍याएको छ। पहिरोको जोखिम बढेपछि तीन परिवारलाई सुरक्षित स्थानमा स्थानान्तरण गरिएको छ।

जिल्ला प्रहरी कार्यालय सङ्खुवासभाका अनुसार सभापोखरी गाउँपालिका–१ धुपुका धनबहादुर विश्वकर्मा र शान्तिराम पोखरेलका परिवार पहिरोको उच्च जोखिममा परेपछि सुरक्षित स्थानमा सारिएका छन्। विश्वकर्माको दुईतले घरको पछाडिको भाग पहिरोले क्षति पुर्‍याएको छ भने पोखरेलको घरसमेत जोखिममा परेको बताइएको छ।

त्यसैगरी खाँदबारी नगरपालिका–६ खानीडाँडाका यारबहादुर तामाङको परिवारलाई पनि सम्भावित जोखिमका कारण घरबाट अन्यत्र सारिएको छ। स्थानीय तह र सुरक्षाकर्मीको समन्वयमा प्रभावित परिवारलाई तत्काल सुरक्षित स्थानमा व्यवस्थापन गरिएको प्रहरीले जनाएको छ।

हाल विस्थापित परिवारहरू छिमेकीको घरमा आश्रय लिएर बसिरहेका छन्। पहिरोले धुपु क्षेत्रमा कृषियोग्य जमिनसमेत पुरिएको छ। स्थानीय किसान राजन राई, कर्ण राई र अम्बर राईले धान रोपाइँको तयारी गरिरहेको खेत पहिरोले कटान तथा पुरिएको जानकारी प्राप्त भएको छ।

धुपु प्रहरी चौकीबाट खटिएको टोलीले जोखिममा रहेका बासिन्दाको उद्धार तथा सुरक्षित स्थानमा स्थानान्तरण गर्ने कार्यलाई निरन्तरता दिएको छ। लगातार वर्षा भइरहेकाले थप सतर्कता अपनाउन स्थानीय प्रशासनले आग्रह गरेको छ।