काठमाडौँ — साताको पहिलो कारोबार दिन सोमबार नेपाल स्टक एक्सचेञ्ज (नेप्से) परिसूचकले निरन्तर उकालो यात्रा कायम राख्दै २७.८५ अंकको वृद्धि हासिल गरेको छ। दिनभर सकारात्मक लयमा रहेको बजार अन्त्यमा १ प्रतिशतले बढेर २,७८६.३५ बिन्दुमा पुगेको हो। यसअघि गएको कारोबार दिन पनि नेप्से १६.३८ अंकले बढेको थियो।

कारोबार सुरु भएदेखि नै बजारमा खरिदकर्ता हाबी देखिएका थिए। सोमबार २३५ कम्पनीको सेयर मूल्यमा वृद्धि हुँदा २८ कम्पनीको मूल्य घट्यो भने ७ कम्पनीको मूल्य स्थिर रह्यो।

आज कुल ५ अर्ब ९८ करोड रुपैयाँ बराबरको सेयर कारोबार भएको छ, जुन अप्रिल २८ पछिकै सबैभन्दा उच्च दैनिक कारोबार हो। उक्त दिन ६ अर्ब ४१ करोड रुपैयाँ बराबरको कारोबार भएको थियो।

नेप्सेमा सोमबार १ करोड ४५ लाख ४० हजार कित्ता सेयर ७५ हजार ८५६ पटक किनबेच भएको तथ्यांक छ। कारोबारका आधारमा अंखु खोला जलविद्युत कम्पनी लिमिटेड अग्रस्थानमा रह्यो। कम्पनीको ६० करोड २० लाख रुपैयाँ बराबरको सेयर कारोबार भएको हो। त्यसपछि रिडी पावर कम्पनी लिमिटेडको ३० करोड १७ लाख ५० हजार रुपैयाँ तथा एपीआई पावर कम्पनी लिमिटेडको १८ करोड ४० लाख १० हजार रुपैयाँ बराबरको कारोबार भयो।

व्यक्तिगत कम्पनीतर्फ थ्री स्टार हाइड्रोपावर लिमिटेडका लगानीकर्ताले सबैभन्दा बढी लाभ कमाए। कम्पनीको सेयर मूल्य ९.०१ प्रतिशतले बढ्यो। विपरीत रूपमा बुङ्गल हाइड्रो लिमिटेडको सेयर मूल्य १०.३२ प्रतिशतले घट्दै सबैभन्दा बढी गिरावट व्यहोर्ने कम्पनी बन्यो।

समूहगत परिसूचक हेर्दा म्युचुअल फन्ड उपसूचक बाहेक सबै क्षेत्र हरियालीमा देखिएका छन्। म्युचुअल फन्ड उपसूचक ०.२ प्रतिशतले घट्दा हाइड्रोपावर समूह सबैभन्दा बढी १.५ प्रतिशतले उकालो लाग्यो। यस्तै उत्पादन तथा प्रशोधन समूह १.३५ प्रतिशत र अन्य समूह १.२३ प्रतिशतले बढेका छन्।