पोखरा महानगरपालिकाले पृथ्वीचोक क्षेत्रमा रहेका अतिक्रमित संरचनामाथि डोजर चलाएको छ। बिहीबार महानगरले सहारा क्लब, सामुदायिक सेवा केन्द्र, जिफन्ट तथा ट्रेड युनियन कांग्रेसलगायत विभिन्न संघसंस्थाका भवन भत्काउन सुरु गरेको हो।

पृथ्वीचोकको मूल सडक हुँदै हङकङ बजारबाट नयाँबजार निस्कने सडक आसपासका अवैध संरचना हटाउने निर्णयपछि व्यवसायीहरूले धमाधम सटर खाली गरेका थिए। महानगरका अनुसार पोखरा बसपार्क निर्माणका लागि २०३२ सालमै अधिग्रहण गरिएको सरकारी जग्गा विभिन्न व्यक्ति तथा संस्थाले अतिक्रमण गरेपछि हटाउने अभियान अघि बढाइएको हो।

पोखरा उपत्यका नगर विकास समितिको स्वामित्वमा रहेको अर्बौं मूल्य बराबरको सार्वजनिक जग्गा वर्षौंदेखि राजनीतिक दल, भातृ संगठन, व्यापारिक समूह र सुकुम्बासीद्वारा अतिक्रमणमा परेको बताइएको छ। यसअघि समितिले ३५ दिने सूचना जारी गर्दै अनुमति बिना बनाइएका सबै संरचना आफैं हटाउन निर्देशन दिएको थियो।

पोखरा महानगरपालिका–९ का वडाध्यक्ष दिपेन्द्र मर्सानीका अनुसार सूचनापछि केही संरचना खाली गरिए पनि बाँकी हटाउन डोजर प्रयोग गरिएको हो। महानगरपालिकाले आगामी दिनमा पनि विभिन्न वडामा रहेका अवैध तथा अव्यवस्थित संरचनामाथि क्रमशः कारबाही जारी रहने जनाएको छ।