प्रधानमन्त्री बालेन शाह ले लोकतान्त्रिक मूल्य–मान्यता, राजनीतिक स्थिरता र नीतिगत निरन्तरताप्रति आफ्नो सरकार पूर्ण रूपमा प्रतिबद्ध रहेको बताएका छन्।

मंगलबार नेपाल भ्रमणमा रहेको युरोपेली मुलुकहरूको उच्चस्तरीय प्रतिनिधिमण्डलसँगको भेटमा उनले नयाँ सरकार गठन भए पनि विगतका सकारात्मक नीतिहरूलाई निरन्तरता दिइने स्पष्ट पारे।

प्रधानमन्त्री शाहले “नयाँ नेतृत्वको अर्थ विगतबाट पूर्ण विच्छेद होइन” भन्दै नेपालको नीति स्पष्ट, स्थिर र पूर्वानुमानयोग्य हुने विश्वास व्यक्त गरे। उनले लोकतान्त्रिक प्रणालीको संरक्षणसँगै स्थायी राजनीतिक वातावरण निर्माणमा सरकार केन्द्रित रहेको बताए।

उनका अनुसार सरकारको मुख्य प्राथमिकता नागरिकको दैनिक जीवनस्तरमा प्रत्यक्ष सुधार ल्याउनु हो। वर्तमान समयको जिम्मेवारीप्रति सरकार पूर्ण रूपमा सचेत रहेको उल्लेख गर्दै उनले सुशासन र समावेशी आर्थिक समृद्धिका लागि जनताबाट स्पष्ट जनादेश प्राप्त भएको बताए।

प्रधानमन्त्री शाहले लगानीमैत्री वातावरण निर्माण, नवप्रवर्तन प्रवर्द्धन र दिगो विकासमार्फत देशमा नयाँ अवसर सिर्जना गर्न सरकार सक्रिय रहेको जानकारी दिए। विश्व बजारसँग सहकार्य बढाउँदै वैदेशिक लगानी आकर्षित गर्न प्रशासनिक प्रक्रियालाई थप सहज बनाइने उनको भनाइ थियो।

विदेश नीतिबारे बोल्दै उनले नेपालले सन्तुलित र व्यावहारिक कूटनीतिक नीति अवलम्बन गरिरहने बताए। छिमेकी राष्ट्र, विकास साझेदार तथा मित्र राष्ट्रहरूसँगको सम्बन्ध आपसी सम्मान, सार्वभौम समानता र साझा समृद्धिमा आधारित रहने उनले स्पष्ट पारे।

प्रधानमन्त्री शाहले नेपालको विकासमा योगदान पुर्‍याउँदै आएका विकास साझेदारहरूप्रति आभार व्यक्त गर्दै व्यापार, हरित ऊर्जा, जलवायु परिवर्तन र पर्यटनलगायत क्षेत्रमा सहकार्य विस्तार गर्न नेपाल इच्छुक रहेको बताए।

विश्वका विभिन्न क्षेत्रमा जारी द्वन्द्वप्रति चिन्ता व्यक्त गर्दै उनले शान्ति स्थापनाका लागि सैन्य टकरावभन्दा संवाद, कूटनीति र अन्तर्राष्ट्रिय कानुनलाई प्राथमिकता दिनुपर्ने धारणा राखे।

भेटका क्रममा काठमाडौँ र नयाँ दिल्लीस्थित युरोपियन युनियन का राजदूतसहित अन्य कूटनीतिक प्रतिनिधिहरूले नेपालमा शान्तिपूर्ण रूपमा निर्वाचन सम्पन्न भएकोमा प्रशंसा गरेका थिए। उनीहरूले सुशासन र आर्थिक समृद्धिको एजेन्डासहित नयाँ सरकारको नेतृत्व सम्हालेकोमा प्रधानमन्त्री शाहलाई बधाई दिँदै नेपालसँग सहकार्य र लगानी विस्तार गर्न तयार रहेको बताएका थिए।