प्युठानको नौबहिनी गाउँपालिका–५ डाम्री काँटेमा वर्षासँगै आएको आकस्मिक बाढीले दुई बालकलाई बगाउँदा एक जनाको ज्यान गएको छ भने अर्का बालक अझै बेपत्ता रहेका छन्।

स्थानीय याम बहादुर खत्रीका दुई छोरा, कक्षा १ मा अध्ययनरत करिब ७ वर्षीय बिमल खत्री र कक्षा ३ मा अध्ययनरत ११ वर्षीय मिलन खत्री विद्यालयबाट घर फर्किने क्रममा जोगीपँधेरा बर्खे खोलामा आएको भीषण भेलमा परेका हुन्। उनीहरू श्री जनता प्राथमिक विद्यालय, नौबहिनी गाउँपालिका–५ काँटेबाट दिउँसो विद्यालय छुट्टी भएपछि घरतर्फ जाँदै गर्दा अचानक परेको अविरल वर्षाका कारण खोलामा आएको बाढीले बगाएको बताइएको छ।

दुवै दाजुभाइलाई बाढीले बगाएपछि स्थानीयवासीले खोजी थालेका थिए। खोजीका क्रममा कान्छो छोरा बिमल खत्रीको शव फेला परेको छ भने जेठा छोरा मिलन खत्रीको अवस्था अझै अज्ञात छ। उनको खोजी तथा उद्धार कार्य स्थानीयवासी तथा सम्बन्धित निकायको सक्रियतामा जारी रहेको जनाइएको छ।

घटनाले खत्री परिवारलाई गहिरो शोकमा डुबाएको छ। बालकहरूका पिता याम बहादुर खत्री वैदेशिक रोजगारीका सिलसिलामा विदेशमा रहेका छन्। घरमा आमा, छ महिनाकी बहिनी तथा बिरामी हजुरबुबा–हजुरआमा मात्रै रहेका कारण यो घटनाले परिवारमाथि थप पीडा थपिएको छ।

घटनापछि परिवारका सदस्यहरू स्तब्ध र विक्षिप्त अवस्थामा रहेको स्थानीयले बताएका छन्।
नौबहिनी गाउँपालिका–५ का वडा सदस्य कुलबहादुर के.सी.का अनुसार एक बालकको शव फेला परिसकेको छ भने बेपत्ता भएका अर्का बालकको खोजी कार्यलाई तीव्रता दिइएको छ।

यस हृदयविदारक घटनापछि सम्पूर्ण गाउँ शोकमग्न बनेको छ। स्थानीयवासीले वर्षायाममा बाढी तथा पहिरोबाट हुने जोखिम न्यूनीकरण, सुरक्षित आवतजावतको व्यवस्था तथा विपद् व्यवस्थापनका पूर्वतयारीलाई प्रभावकारी बनाउन सम्बन्धित निकायको गम्भीर ध्यानाकर्षण गराएका छन्।