कृषि आधुनिकीकरण र किसान सम्मान आजको आवश्यकता : राष्ट्रपति रामचन्द्र पौडेल

कृषि आधुनिकीकरण र किसान सम्मान आजको आवश्यकता : राष्ट्रपति रामचन्द्र पौडेल

रामचन्द्र पौडेलले कृषि क्षेत्रको विकास र किसानको सम्मानलाई राष्ट्रको प्राथमिक एजेन्डा बनाउनुपर्ने बताएका छन्।

कृषि, वन तथा वातावरण मन्त्रालयले शुक्रबार आयोजना गरेको राष्ट्रिय उत्कृष्ट कृषक पुरस्कार कार्यक्रममा बोल्दै राष्ट्रपति पौडेलले देशको समृद्धि कृषि क्षेत्रसँग प्रत्यक्ष रूपमा जोडिएको उल्लेख गरे। उनले किसानको मेहनत र समर्पणले नै मुलुकको अर्थतन्त्रलाई बलियो बनाएको बताए।

राष्ट्रपति पौडेलका अनुसार कृषि केवल जीविकोपार्जनको माध्यम मात्र नभई राष्ट्र निर्माणको आधार हो। उनले श्रमको सम्मान गर्ने संस्कृतिको विकाससँगै कृषि पेसालाई थप मर्यादित र आकर्षक बनाउनुपर्नेमा जोड दिए।

उनले कृषि क्षेत्रमा लगानी वृद्धि, आधुनिक प्रविधिको प्रयोग, उत्पादनको उचित बजारीकरण तथा युवाको सक्रिय सहभागिता आवश्यक रहेको बताए। राज्य, निजी क्षेत्र र सरोकारवाला निकायबीच सहकार्य भए कृषि क्षेत्रलाई रोजगारी र आर्थिक समृद्धिको मुख्य आधार बनाउन सकिने उनको भनाइ थियो।

युवाशक्तिको ऊर्जा र आधुनिक प्रविधिको उपयोगमार्फत कृषि क्षेत्रलाई नयाँ उचाइमा पुर्‍याउन सकिने उल्लेख गर्दै उनले कृषकको सम्मान, कृषि पेसाको संरक्षण र आधुनिकीकरणलाई समयको अपरिहार्य आवश्यकता भएको बताए।

कार्यक्रममा उत्कृष्ट कृषकहरूलाई सम्मान गर्न पाउँदा खुसी लागेको उल्लेख गर्दै राष्ट्रपति पौडेलले कृषकहरू राष्ट्रका सच्चा संवाहक भएको धारणा राखे।